Районда «Трактор» операциясе үтте

Әлеге чара шартлы исем белән “Трактор операциясе” дип атала. Чарада Гостехнадзорның Лениногорск районы буенча бүлек начальнигы Илнур Галимов һәм Лениногорск ЮХИДИ бүлеге начальнигы Айдар Хаҗиев катнашты.

“Трактор” операциясе техникаларны эксплуатацияләгәндә хокук бозуларны, юл һәлакәтләрен булдырмау максатыннан үткәрелә. Аграр хуҗалык эшләре вакытында авыл хуҗалыгы машиналары һәрвакыт хәрәкәттә, тракторчы-механизаторның травма алуын булдырмау мөһим”, - ди Илнур Галимов.

Әлеге операция барышында трактор йөртүченең таныклыгыннан алып, тракторның, прицепларның төзеклеген, учетка куелганмы юкмы икәнен, кыскасы, трактор һәм тракторчы белән бәйле барлык эшләр дә тикшерелә.

“Узган атнада 10нан артык үзйөрешле машина һәм аларның тагылмалары тикшерелде. Рейд барышында 3 хокук бозу очрагы ачыкланды. Беркетмәләр төзелде. Гаеплеләр административ җаваплылыкка тартылды”, - дип хәбәр итә Гостехнадзордан Илнур Галимов.

фотолар: Илнур Галимов