ТАҺИР ШӘМСУАРОВТАН ШАЯН ШИГЫРЬ: ТАПКЫР СОЛДАТ

Тапкыр солдат

Иптәш майор, бүгенге көн
Куаныч белән тулган.
Бая хатын шалтыратты, 
Безнең балабыз туган.

Әтиемдәй күрәм сезне
Хәлләремә керегез.
Туган ягыма кайтырга
Миңа рөхсәт бирегез!

Авылыңда тоткарланма, 
Ун тәүлек вакыт сиңа.
Отпусканың нәтиҗәсен 
Хәбәр итәрсең миңа.

Йә, ефрейтор, кәеф ничек, 
Сәфәрләрең уңдымы?
Кыз бармы, әллә малаймы, 
Тәпиләрен юдыңмы?!

Гафу, генерал чакыра,
Башка вакыт керермен.
Иптәш майор, тугыз айдан 
Төгәл җавап бирермен. 

Таһир Шәмсуаров