Татарстанда гаилә сәясәтен гамәлгә ашыру буенча чаралар планы расланды

Татарстанда Гаилә һәм демографик сәясәтне гамәлгә ашыру, Россия Федерациясендә күп балалыкка ярдәм итү буенча 2036 елга кадәр исәпләнгән гамәлләр стратегиясен гамәлгә ашыру буенча чаралар планы расланды, дип хәбәр ителә Татарстан Республикасы Министрлар Кабинеты боерыгында. Документ «Гаилә» илкүләм проекты кысаларында әзерләнгән.

План гаилә институтын ныгытуны, традицион гаилә кыйммәтләрен яклауны һәм үстерүне үз эченә ала. Ел саен республикада гражданнарны хокукый агарту буенча кимендә 1 мең чара уздырылачак.

Коммерцияле булмаган оешмалар һәм волонтерлык инициативаларының традицион гаилә кыйммәтләрен популярлаштыруга юнәлдерелгән социаль проектларына ярдәм итү каралган. «Аларга мәхәббәт бүләк ит» һәм «Үзгәреш» хәйрия программалары стационарларда ятим балаларны индивидуаль рәвештә тәрбияләүне һәм сөйләм үсешенең тоткарлануын җиңәргә булышуны тәэмин итәчәк. «Гаилә клубы» программасы ятим балаларны азык-төлек, кием-салым, көнкүреш техникасы, спорт кирәк-яраклары белән тәэмин итәчәк һәм ялларын оештыруда булышачак.

2030 елга кадәр Татарстанда ихтыяҗлары ачыкланган торак пунктларда ике мәктәпкәчә белем бирү оешмасы төзүне тәэмин итү, шулай ук 2028 елга 16 балалар бакчасына капиталь ремонт үткәрү һәм җиһазландыру планлаштырыла. Чараларны финанслау ТР бюджеты турындагы законда каралган бюджет ассигнованиеләре чикләрендә гамәлгә ашырыла. Боерыкның үтәлешен контрольдә тоту ТР Хезмәт, халыкны эш белән тәэмин итү һәм социаль яклау министрлыгына йөкләнгән.

https://tatar-inform.tatar