ДАИ хезмәткәрләре исерек хәлдә рульгә утырган хатын-кызны Куакбаш авылы урамында тоткарлыйлар

 Хатын-кызның хәмер кабып руль артына  утыру сәбәбен ни белән аңлатырга?  Шундый гаебе өчен административ җәза алган 57 яшьлек ханым, моның сәбәбен “улым турында бик борчылудан килеп чыкты” дип аңлаткан.

Бүгенге көндә Чирмешән районының Урманасты Үтәмеш авылында яшәүче, Казахстанда туып-үскән хатын-кызны руль артында барганда ГАИ инспекторлары туктаткан. Әлеге хәл Куакбаш авылының Һади Такташ урамында төнге 12ләр тирәсендә булган. 

Алкотектор ханымның исерткеч эчемлекләрне яхшы гына кулланган булуын күрсәткән. Суд каршына баскач, хатын-кыз үзенең руль артына мондый хәлдә беренче кабат утыруын, улы белән килеп чыккан күңелсез хәлләрдән соң,  үз-үзен тотып кала алмавыннан килеп чыгуын әйткән. 

Әлбәттә, хокук сагында торучылар хатын-кызның бу сүзләрен шик астына куймаган, әмма исерек хәлдә руль артына утыруын да кичермәгән.

Суд  карары катгый: исерек килеш руль артына утырган өчен хатын-кызга  45 мең сум күләмендә штраф, шулай ук 1,5 елга машина йөртү таныклыгыннан мәхрүм итү билгеләнгән. 

Карар чыгарганда хокук бозучының чын күңелдән үкенүе һәм аның балигъ булмаган баласы булуы исәпкә алынган.