Кредиттан баш тартам дип, лениногорскилы хатын-кыз 250 меңгә алданган

Караклар 50 яшьлек хатын-кызга 250 мең сум акчалата зыян салган.

Инде бик күп тапкырлар язылган очраклардагы сыман,  хатын –кызның телефонына билгесез кеше шалтыратып, үзен банк хезмәткәре итеп таныштырган.

Аның исеменә 250 мең сумга кредит картасы рәсмиләштерелүен хәбәр иткән. Ханым үзенең кредит сорап беркая да мөрәҗәгать  итмәгәнлеген, гомумән, кредит алырга җыенмаганлыгын әйткән. Рәсмиләштерелгән картаны блокировкага куюларын сораган. Әмма шалтыратучы, хатын –кызны, моның өчен картаны активлаштырырга һәм кредит акчаларын иминият партнерына күчерергә кирәклегенә ышандырган.

Моның өчен, билгеле, ханым телефонына ул әйткән яңа кушымтаны йөкләп, барлык әйтелгән нәрсәләрне дә шул кушымта аша башкарырга тиеш булган. Зыян күрүче кушымтаны телефонына  урнаштырып, әңгәмәдәше әйткән барлык гамәлләрне үтәгән. Шул рәвешчә, Лениногорскида яшәүче үз исеменә кредит рәсмиләштереп, ул акчаларны өченче затка күчерүен аңламый да калган.

 Бу очракта  яңа урнаштырылган кушымта – аның телефонына ерактан керү чарасы булган.  

Әлеге факт буенча РФ Җинаять кодексы 159 маддәсенең 2 өлешендә каралган “мошенниклык” буенча җинаять эше кузгатылган.