Куян кайсы хайваннар белән дус?

Куян белән Маймыл мөнәсәбәтләрен мавыктыргыч маҗара дип әйтергә була. Нинди генә хисләр булса да, аларның мәхәббәте дәвамлы була алмый. Чөнки Куянның нинди хисләр кичерүе Маймылга кызык түгел. Куян аңа елышырга тырышса, Маймыл, киресенчә, кире этәрә. Тик төптән уйласаң, Куян - Маймыл өчен менә дигән пар, чөнки Куян ярдәмендә ул үзен тулысынча ача ала. Аларга мәхәббәт түгел, ә дуслык күбрәк туры килә.

Куян белән Әтәч мөнәсәбәтләренең киләчәге бар. Әтәчкә үзенчәлекле кешеләр ошый, ә Куяннар нәкъ менә шундый. Ир кеше - Әтәч, хатын-кыз - Куян булса, ике арада мәхәббәт булырга мөмкин. Мондый хатын белән Әтәч башкалар янында горур һәм үзенә ышанучан булып йөриячәк. Ә инде ир кеше - Куян, хатын-кыз Әтәч булса, алар арасында дуслык кына була ала.

Куян белән Эт арасында ярату булырга мөмкин, әмма алар күрешсә, әйткәләшә башлый. Мондый парлар гаилә булып озак яши алмый, шулай да искәрмә булырга мөмкин. Кагыйдә буларак, Этләр гел көнләшә, шикләнә. Үзләренә ышаныч булмаганлыктан, алар еш кына хыянәт итә. Әнә шуның аркасында Этләрнең гаиләсе таркала.

Куян белән Кабан дуңгызының туры килүе якынча 40% тәшкил итә. Кабан дуңгызы Куянга пар түгел, чөнки ул - ялкау, ә Куян сәяхәт итәргә ярата. Ләкин шул ук вакытта Кабан дуңгызы - ышанычлы һәм тугры. Әгәр хатын-кыз - Куян, ир-ат - Кабан дуңгызы булса, алар бәхетле гаилә кора алачак, чөнки Кабан дуңгызы менә дигән әти була ала.

Куян белән Күсе бер-берсенә бөтенләй туры килми. Беренче караштан ук алар бер-берсен күрә алмас дәрәҗәгә җитә. Куян Күсене өнәми. Күсе - елгыр, җитез, астыртын, аңа башкаларның нәрсә кичерүе мөһим түгел, ул фәкать үзе турында гына уйлый. Шуңа күрә Куян белән Күсе арасында мәхәббәт тә, дуслык та була алмый.

Куян белән Үгезнең мөнәсәбәтләрен идеаль дип әйтергә була. Бер-берсен бер караштан аңлыйлар. Еллар узган саен аларның мөнәсәбәтләре ныгый бара. Алар бер-берсен тулыландырып тора. Куян белән Үгез уртак бизнес ачырга да мөмкин: Куян идеяләр белән ярдәм итсә, Үгез аларны тормышка ашырачак. 

Куян белән Юлбарыс арасында шактый яхшы мөнәсәбәтләр булырга мөмкин. Бу парны идеаль дип әйтеп булмый, әмма башкалар белән чагыштырганда, Юлбарыс Куянга күбрәк туры килә. Аларның уртак темалары күп. Кайвакыт Юлбарыс биеклеккә омтылырга, ә Куян бүгенге көненнән канәгать булырга мөмкин. Әгәр уртак фикергә килә белсәләр, Куян белән Юлбарысның мөнәсәбәтләре нык булачак.

Куян белән Куянның мөнәсәбәтләре - идеаль. Алар һәрвакыт бер-берсенә карап яңалык ача, нидер өйрәнә, алга атлый. Ике куян арасында көнләшү юк. Алар бер-берсенә ышана. Бер фикердә булулары - уңышка ирешүнең сере. 

Куян белән Аждаһа арасында бер күрүдән мәхәббәт яралырга мөмкин. Ләкин гаилә корсалар, аларның тормышы маҗараларга бай булачак. Мөнәсәбәтләре бозылган очракта, моңа Аждаһаның үзен артык яратуы сәбәпче булыр, мөгаен. Аңа үзен кулда тотарга өйрәнергә кирәк. 

Куян белән Еланның мөнәсәбәтләре бик үк яхшы була алмый. Алар арасында ярату юк, дуслык та сирәк кенә була. Елан - астыртын, ул уйламаган җирдән чагып алырга мөмкин. Куян Еланны ерак арадан тоя, шуңа да Куян аны урап уза, аннан ераграк тору җаен карый. 

Куян белән Атка беркайчан да күңелсез түгел, алар эштә дә, дустанә мөнәсәбәтләрдә дә һәм мәхәббәттә дә бер-берсен тулыландырып тора. Куянга Атның аны яклавы, саклавы ошый. Тик кайвакыт Ат барысын да шулкадәр җитез хәл итә, Куянга бу ошамаска мөмкин. Чөнки Куян җиде кат үлчәп бер кат кисә.

Куян белән Кәҗә арасында 100% мәхәббәт булырга мөмкин, тик алар арасында гаилә коручылар бик сирәк. Аларга икәү бергә уңышка ирешү авыр бирелә. Кәҗә - ялкау, ул акча эшләүгә караганда, аны туздырырга ярата. Әгәр алар алдан ук вазифаларын бүлеп, уртак фикергә килсә, бу гаилә нык булачак.

Әгәр бу йолдызнамәдә теге яки бу кеше сезгә туры килми дип язылган икән, бу аның белән мөнәсәбәтләрне өзәргә кирәк дигән сүз түгел. Йөрәгегез кушканча эшләгез һәм бер-берегезгә сабыр, мәрхәмәтле, игътибарлы булыгыз. Шул вакытта теләсә нинди мөнәсәбәтләр дә яңа сулыш алачак.

http://shahrikazan.ru/news/yazmalar/gez-beln-ideal-par-ksene-kr-almyy-kuyan-kaysy-khayvannar-beln-dus

Рамия Гарифуллина фотосы