Лениногорск Картлар һәм инвалидлар йортына Яңа ел шатлыгы керде (фотолар)

Лениногорск Картлар һәм инвалидлар йортында тәрбияләнүче апа-абыйлар янына Кыш бабай белән Кар кызы килде. Алар өлкәннәр белән балачакка кайтып килде: Чыршы янында әйлән-бәйлән уйнады, җыр җырлатты, Кыш бабай капчыгыннан конфетлар өләште. Әнә шулай "Лениногорскнефть" идарәсе җитәкчелеге волонтерлар катнашында әби-бабайларга бәйрәм кәефе бүләк итте.

Идарә ел саен "Татнефть" җәмгыяте белән шундый чара уздыра. Менә быел да күп итеп бүләкләр белән килгәннәр, биредә яшәүчеләргә урын-җир комплекты, продуктлар җыелмасы, апа-әбиләргә яулык, абый-бабайларга кепка бүләк иттеләр.

5нче мәктәп укучылары матур итеп концерт әзерләгән иде, үз куллары белән ясалган открыткалар бирделәр.

Розалия Мостафина фотолары