Лениногорскида "Гыйлем нуры" узды (фотолар)

Бәйгенең төп максаты - мөселманнарның гыйлем алуга мәхәббәтләрен уяту,  мәхәлләләр һәм мөхтәсибәтләр арасында эшчәнелек тәҗрибәсе белән бүлешү, татар телен ныгыту, мөселманнарны дуслаштыру.

Бу елны ул бездә 7 нче тапкыр үткәрелде. Бәйгегә 11 районнан кичке дәресләрдә катнашкан 4әр абыстай килде. Алар арасында Казан, Яр Чаллы, Кукмара, Балтач, Мөслим, Чирмешән, Азнакай, Бөгелмә, Урыссу, Баулы һәм әлбәттә, Лениногорск вәкилләре булды.

Хөрмәтле кунак булып Татарстан  баш казые Җәлил хәзрәт Фазлыев, Көньяк-Көнчыгыш төбәге казые Марат хәзрәт Марданшин һәм районнар мөхтәсибләре килделәр. Беренчелекне Лениногорск төркеме яулады. Алар грамоталар һәм затлы бүләкләр белән бүләкләнде. Һәр катнашучыга кыйммәтле бүләкләр тапшырылды. Бәйрәм төшке аш белән тәмамланды.

“Ихлас” мәчете әйтүенчә, бу изге чараны үткәрүдә Татарстан Республикасы мөфтие Камил хәзрәт Самигуллин зур өлеш керткән. “Камил хәзрәткә һәм "Хәләл" комитет җитәкчесе Ирек хәзрәт Зиганшинга Лениногорск мөхтәсибе Исмаил хәзрәт Сингатуллин исеменнән һәм барлык мөселманнардан чиксез рәхмәтләр белдерәбез. Аллаһ Тәгалә каршында кылган һәр изгелекләре Җәннәткә керергә сәбәп булсын! Амин!”, дип хәбәр итәләр мәчеттән.

Фотолар: "Ихлас" мәчетеннән