Лениногорскиның 66нчы янгын сүндерү частенә яңа машина кайтты (фотолар)

Шәһәребездәге 66нчы янгын сүндерү частена яңа машина Россия Гадәттән тыш хәлләр министрылыгының ТР буенча баш идарә җитәкчесенең урынбасары, подполковник Рафаил Мотыгуллин тапшырды.

- Бәла-казаларны булдырмау - янгын сүндерүчеләрнең төп максаты һәм сез бирелгән бурычларны тиешенчә үтисез.Ә бу машина җаваплы эшегездә төп ярдәмче булачак. Яңа техниканы җентекләп өйрәнергә, аның бөтен мөмкинлекләрен эшкә җигәргә,- диде Рафаил Нурхаметович.

Шулай ук 2018 елның бәйрәм ялларында, башка еллардан аермалы буларак, гадәттән тыш хәлләр булмавын да ассызыклап үтте.

Коточкыч сирена тавышы көннең теләсә кайсы вакытында аваз салырга мөмкин, шуңа да техниканың төзек булуы бик әһәмиятле. Заманча җиһазландырылган, ышанчылы янгын сүндерү техникасы ,билгеле, янгынны уңышлы сүндерергә мөмкинлек бирә.

Район башлыгы Рәгать Хөсәенов, үз чиратында, республика җитәкчелегенә, шәхсән Рафаил Мотыгуллинга шәһәребезне яңа янгын сүндерү машиналы иткәне өчен рәхмәтләрен җиткерде.

- Кызганыч ки, янгын очраклары булып тора. Яңа машина киләчәктә безне бәла-казалардан сакларга ярдәм итәр, - диде ул.

Текст һәм фото авторы: Зилә Мөдәррисова