Тимәш авылында тротуар салалар (фотолар)

Тимәш халкы авыл уртасынан узучы юл кырыенда тротуар юклыктан бик нык интекте. Быел аларны юллы итәргә җыеналар, бүген анда бик кызу эш бара.

Бу проблема әлеге авыл халкын күптән борчый иде. Ниһаять боз кузгалган, бүген Утыз Имәни исемен йөртүче әлеге урамда эш бара.

-Тротуар машина юлы белән тоташкан булганга, аны 20 сантиметрга биегрәк итеп ясыйбыз. Проект буенча, аның култыксалары да булырга тиеш иде, әмма бердәм фикергә килеп, мәсьәләне башкача хәл иттек. - ди авыл башлыгы Рафаэль Сираев.

Тимәштә быел зур эшләр шактый башкарыла. Юллар белән беррәттән, баганалардагы утларны алыштыру белән дә шөгыльләнәләр. Урам баганаларына җитмеш җиде өр-яңа заманча светильник куелачак.

Тимәштә башкарылучы эшләр белән Зилә Мөдәррисова танышып кайтты