Азык-төлек сыйфатын тәэмин итүдә хилафлыкларга юл куйган өчен штрафка тартырга мөмкиннәр

Россиядә азык-төлек продуктлары, эшләнмәләр һәм материалларның сыйфатын тәэмин итүдә хилафлыкларга юл куйган өчен штрафка тартырга мөмкиннәр. Шул хактагы закон проекты Дәүләт Думасына тапшырылган. Бу хакта «Российская газета» яза.

Хәзер сыйфатсыз продуктлар экспертиза үткәреп тормыйча гына утильләштерелергә яки юкка чыгарылырга тиеш. Аңа кадәр җитештерүче күзәтчелек органы вәкиле катнашында продуктның үзлеген алга таба кулланып булмаслык итеп үзгәртергә бурычлы.

Әмма чынлыкта гамәлдәге закон таләпләре һәрвакытта да үтәлми. Нәкъ менә шундый очракларда штраф санкцияләре кертергә тәкъдим ителә дә инде, диелә закон проектына аңлатма язуында.

РФ Административ хокук бозулар кодексына тиешле төзәтмәләр кертелгән очракта, гражданнарга штрафларның күләме – 2-4 мең, вазифаи затларга – 20-40 мең, юридик затларга 200-500 мең сум тәшкил итәчәк.

 Фото:https://pixabay.com

https://tatar-inform.tatar