Brent маркалы нефтьнең бер барреле бәясе 77,7 долларга җитте

(Казан, 10 май, «Татар-информ»). Brent маркалы нефтьнең бер барреле бәясе Лондон биржасында 77,7 долларга сатыла башлаган, дип хәбәр итә «Интерфакс» агентлыгы.

Brent һәм WTI маркалы нефтьнең бәясе әле бүген дә күтәрелүен дәвам итә.

Экспертлар нефть бәясе күтәрелүне АКШның Иран белән төзелгән атом-төш программасы буенча килешүне өзәргә ниятләве һәм геосәяси киеренкелекнең артуы белән бәйли. Моннан тыш, АКШ Президенты Дональд Трамп әлеге илгә карата санкцияләр кертергә ниятли. Иран ОПЕК оешмасына кергән илләр арасында нефть чыгару күләме буенча өченче урынны били.

фото: /pixabay.com