Лениногорскида гриппка каршы прививка ясата башладылар (ФОТОЛАР)

-Гриппка каршы көрәшнең иң яхшы алымы – вакцина ясату. Аны эпидемия башланганчы, көз көне ясату нәтиҗәле. Шуңа да хастаханәгә мөрәҗәгать иткән һәр кеше белән гриппка каршы вакцина ясату буенча аңлату эшләре алып барабыз, - ди участок терапевты Галия Ялалова. 
   Хәзерге вакытта өлкәннәр өчен 2 меңнән артыграк препарат кайткан. Аны ясату-ясатмау ирекле, тик риск төркеменә керүчеләргә аны ясату аеруча да тәкъдим ителә. Әлеге төркемгә балалар, алтмыш яшьтән өлкәнрәкләр, хроник авыру, вирус инфекциясе белән еш авыручылар, кешеләр белән турыдан-туры элемтәдә булучы укытучылар, медицина хезмәткәрләре, халыкка хезмәт күрсәтүче оешмада эшләүчеләр керә. Аларның 75 процентына грипптан прививка ясалган булырга тиеш, ди белгечләр.
  Вакцина ясаганнан соң, 14-21 көн эчендә иммунитет барлыкка килә һәм ул алты айдан бер елга кадәр грипп авыруыннан саклый. 

-Без үзебез дә ел саен гриппка каршы прививка ясатабыз. Алдан коралланган булып торуың күпкә хәерлерәк, - шәфкать туташы Резедә Гыйльфанова. – Грипп – кешедәге инфекцион авырулар арасында беренче урында тора. Аның белән авыруның нәтиҗәсе бик катлаулы булырга мөмкин. Шуңа гриппка каршы вакцина ясатуга бик җитди карарга кирәк. 
   Гриппка каршы прививка ясату өчен медицина-санитар частенең 17нче кабинетына иртәнге 8 дән 16.00 сәгатькә кадәр мөрәҗәгать итәргә була, паспорт һәм полис кирәк. Прививка ясату бушлай.

Зилә Мөдәррисова тексты һәм фотосы