Татарстанда юл фаҗигасендә 19 яшьлек егетнең гомере өзелде

“Рено Сандеро“ автомобиле көтмәгәндә каршы якка чыга һәм ВАЗ-1112 машинасы белән бәрелешә. Соңгысы белән идарә иткән егетнең хастаханәдә йөрәге тибүдән туктый. Аның янәшәсендә булган әнисенең хәле тотрыклы.
“Рено“ машинасында тулы бер гаиләнең Ижаудан Казанга ял итәргә баруы мәгълүм. Алар кечкенә улларының бер яшь тулган көнен билгеләп үтәргә аквапаркка юл тоткан булалар. Бу машинадагыларның берсенә дә зыян килми, дип яза җирле басма.
 
Балаларның махсус утыргычларга урнаштырылган булуы җәрәхәтләнүдән саклап калган, – ди ЮХИДИ  бүлекчәсе начальнигы Олег Капилов. – Шуңа ата-аналарны тагын бер кат кисәтәсе килә: балаларны махсус җайланмаларга утыртып йөртегез һәм куркынычсызлык каешын тагарга онытмагыз.
 
Хәзерге вакытта һәлакәтнең сәбәпләрен ачыклау буенча тикшерү чаралары алып барыла.

http://matbugat.ru/news/?id=23351