“Сатурн-Урал” хуҗалыгында язгы чәчүгә авыл хуҗалыгы техникаларын әзерләү буенча семинар узды (ФОТОЛАР)

Семинарда катнашкан башкарма комит җитәкчесе Наил Залаков язгы чәчүне тиз арада һәм сыйфатлы итеп башкарып чыгу бурычы куйды. “Моның өчен хуҗалыкның минераль ашлама, орлык, ягулык-майлау материаллары белән җитәрлек күләмдә тәэмин ителүе кирәк, шулай ук авыл хуҗалыгы техникаларының ватылмыйча эшләве мөһим”, - ди ул.

Авыл хуҗалыгы идарәсе начальнигы Илнур Шәмарданов язгы чәчү планы, аңа әзерлек белән таныштырды. Быел районда язгы чәчү эшләре 35 мең гектардан артык мәйданда башкарылачак. Язгы кыр эшендә 180 берәмлек трактор, 20 чәчү комплексы, 50 чәчү агрегаты һәм башка техникалар катнашачак.

Авыл хуҗалыгы идарәсенең производство-маркетинг бүлеге начальнигы Ренат Мостафин һәм “Сатурн-Урал” хуҗалыгының агрономы Ринат Исмәгыйлев авыл хуҗалыгы машиналарын көйләү механизмнары һәм агрегатларга куелган тиешле агротехник кагыйдәләр белән таныштырдылар.

Гстехнадзорның Лениногорск бүлеге баш инспекторы Илнур Галимов хуҗалыкларда уза торган техник күзәтүләр турында сөйләде.
Шулай ук хезмәтне саклау, янгын куркынычсызлыгы кагыйдәләренә игътибар бирелде.

Розалия Мостафина
Фотолар: авыл хуҗалыгы идарәсеннән