Таһир Шәмсуаров: Бу дөньяның бөтен матурлыгы - балам дигән назлы сүздә

Бүген таңда төшкә кердең әле

Бүген таңда төшкә кердең әле,
Газиз дими менә ни дисең.
Минем сыман күпләр уянадыр
Күрәселәр килеп әнисен.

Бу дөньяның бөтен матурлыгы
“Балам!” – дигән назлы сүзеңдә.
Сабый чакка кабат аяк бастым
Гомеремнең алтын көзендә.

Тиңсез бәхет иде янәшәдә,
Яныбызда синең барлыгың.
Таң атуга шыпырт кына дәштең:
“Кыстыбыем пеште, тор улым!”.

“Ир бала ул-ил терәге!”-дидең,
Истә тора әйткән сүзләрең.
Сәфәр чыккан көннән тәрәзәдән
Китмәделәр беләм, күзләрең.

Бүген таңда төшкә кердең әле,
Изге дими сиңа ни дисең.
Минем сыман күпләр уянгандыр
Төшләрендә күреп әнисен!..

Таһир Шәмсуаров