Бала рәсеме ни сөйли?

Үзләренә ышанмаган балалар рәсемне кәгазь битенең бер почмагына гына ясыйлар икән. Психологлар шулай дип саный. Детальләрне әледән-әле бозгыч белән бетерәләр. Икеләнәләр. Бу түбән үзбәя турында сөйли.

√ Күпләр әтиләрен зур, көчле итеп күрсәтә. Гаиләдә аның тоткан урынына бер ишарә ул. Рәсемдә әни кеше читтәрәк торса, әтидән күпкә кечерәк булса, димәк, гаиләдә аның роле, сүзе мөһим түгел.

√ Гаиләне сурәтләгәндә кемнедер төшереп калдырса, аның роле юк дип аңларга кирәк. Бала эне-сеңелләреннән көнләшсә дә, аларны «онытып» калдыра.

√ Баш интеллект символы булып тора. Зур баш акыл үсешен күрсәтә. Яклауга мохтаҗ бала үзен, һичшиксез, баш киеме «кидереп» ясый.

√ Колак - ишетә, тыңлый белүне аңлата. Тәнкыйтьне кабул итмәүчеләр, кеше сүзенә колак сала белмәүчеләрнең «кеше»ләре колаксыз килеп чыга.

√ Авыз - үз фикереңне, хокукларыңны яклар өчен. Тешләре күренеп торган авызны агрессив балалар ясый.

√ Куллар - башкалар белен элемтә урнаштыра алу сәләтен ача. Бала җитез, физик яктан нык дип укырга кирәк. Үз-үзенә ышанмаган балалар рәсемендә куллар йә кесәгә тыгылган, йә артка яшерелгән була.

√ Зур күзләр куркуны, шомны чагылдыра.

√ Аяклар тормыштагы терәк турында сөйли. Бала бәйсез булырга теләсә, озын аяклар ясый.

√ Наз, ярату җитмәгән балалар чәчәк ясый.

√ Ябык ишекләр, ябык сарайлар баланы тыюлар күп икәнен аңлата. Ишек-тәрәзәсез өйләр - аралаша белмәү билгесе. Тәрәзәләр азрак булган саен, бала кыюсызрак.