Бәхетле балачак илендә

Шәһәр мэры Рәгать Хөсәенов котлавы бәйрәмне башлап җибәрде:

- Кадерле балалар, килгән кунаклар! Әлеге бәйрәм тәүге тапкыр 1950 елда билгеләп үтелгән. Шул көннән башлап аны ел саен үткәрү традициягә керде. Район һәм шәһәрдә 10 меңнән артык бала бар. Шуларның 5меңгә якыны быел ял һәм сәламәтләндерү лагерьларында ял итәчәк. Моннан тыш, ишегаллары лагерьлары эшләп, шактый гына бала анда йөриячәк. Ә бүген сезне бәйрәмегез белән ихластан тәбрик итеп, сәламәтлек һәм күңелле яллар телим, - диде.

Сәхнәгә "Ана капиталы" сертификатлары алу өчен икенче һәм өченче балаларын тудырган аналар менде. Рәгать Галиәгъзамович аларга һәм балаларына сәламәтлек теләп, сертификатлар тапшырды. Бәйрәм шәһәр һәм район мәктәпләре, урта, югары уку йорты студентларына стипендия тапшыру тантанасы белән дәвам итте. Рәгать Хөсәенов аларга да киләчәктә уңышлар теләде.

"Коляскалар парады" игълан ителеп, берсеннән-берсе кызык һәм оригиналь бала арбалары тартып, сәхнә алдына 14 гаилә чыкты. Конкурс булгач аның үз биремнәре дә була. "Визит карточкасы"нда катнашучылар үз гаиләләрен тәкъдим итәргә тиеш булды. Ул шигырьләр һәм җырлар ярдәмендә башкарылды. Алып баручылар икенче биремне дә әзерләгән иде. Һәр гаилә балага кагылышлы сорауга җавап бирергә тиеш булды. Барлык конкурсны мәртәбәле жюри әгъзалары бәяләп барды. Бер генә гаилә дә дипломсыз калмады. Ә беренче урынга "Балачак хыялы" номинациясендә җиңү яулап, Петропавловских, икенче урынга "Актуальлек" номинациясендә танылган Румянцевлар һәм "Өмет" номинациясендә җиңгән Вәлиевләр гаиләсе лаек булды. Җиңүчеләргә дипломнар һәм бүләк сертификатлары тапшырылды.

Җыр-бию күңелле бәйрәмне дәвам итте. Сәхнә алдында аның иң бәхетле геройлары - балалар, артистлар җырына кушылып, җырлап-биеп күңел ачты.