Һөҗүм итүче укучыны туктаткан Түбән Кама лицее җыештыручысына 500 мең сум түләячәкләр

 Бу хакта эшлекле дүшәмбедә Түбән Кама районы башлыгы Радмир Беляев хәбәр иткән, дип яза Татар-информ.

Ул билгеләп үткәнчә, Алсу Әнәсова гамәлләре нәтиҗәсендә һөҗүм итүченең игътибарын читкә юнәлтү мөмкин булган, бу исә җитдирәк нәтиҗәләргә юл куймаган. Беляев зыян күрүченең хәле тотрыклы һәм аның тормышына куркыныч янамый, дип өстәде.

Ул ассызыклаганча, мәктәп хезмәткәрләре бу куркынычка оператив рәвештә җавап биргәннәр: директор урынбасары радио аша тревога игълан иткән, укытучылар һәм укучылар кабинетларга кереп яшеренгәннәр, ишекләрне бикләп куйганнар һәм махсус хезмәтләр килгәнче куркынычсыз урыннарда калганнар.

Исегезгә төшерәбез: инцидент 22 гыйнварда булды: 7 нче сыйныф укучысы лицейга пычак алып керә һәм техник хезмәткәрне яралый, шуннан соң сигнал җайланмасыннан атып, үзе дә зыян күрә. Яшүсмерне Росгвардия тоткарлый, хәзер ул хастаханәдә ята.