Хәзрәт Кадер кичәсендә сораячак теләкләрне алдан язып барырга киңәш итте

«Гаилә» мәчете имам-хатыйбы Рөстәм хәзрәт Хәйруллин Кадер кичәсендә Аллаһы Тәгаләдән сорарга ниятләгән теләкләрне алдан язып барырга киңәш итте.

«Үзегезгә кәгазь алып, Рамазан дәверендә нәрсә кирәк – шуны язып барыгыз. «Моны, шуны сорыйм», – дип язып, Кадер кичендә кулларны күтәреп, кирәк әйберне үзегезгә һәм, гомумән, бөтен халыкка да сорагыз. Мәсәлән, «Йә Раббым, шифаларны бир, чирләгән бөтен кешеләргә, миңа да шифасын бир, дип», – диде ул «Гадел әңгәмә» тапшыруының Рамазан аена багышланган махсус чыгарылышында.

Рөстәм хәзрәт Кадер киченең ни өчен яшеренгәнен дә аңлатты. 

«Расүлебез (с.г.в.) хәдистә: «Мин көнен белә идем, оныттым», – ди. Галимнәр: «Шушы мизгелдә бөтен догаларыбыз кабул ителә, ел буе гөнаһлар кылып, шушы вакытта гына кулларны күтәреп, елап дога кылыр идек», – дип аңлата. Расүлебез (с.г.в.) шул хикмәттән әйтмәгәндер. Ләкин ул: «Ахыргы ун төндә эзләгез, гыйбадәттә, изгелектә булыгыз», – дигән. Хикмәте зур. Кадер кичәсенең кайчан икәнен беребез дә белми, шуңа да күбрәк изгелек кылыйк», – диде ул.

Тапшыруны  Ютуб-каналда карый аласыз.

https://tatar-inform.tatar