«Күрше Фест»та Лениногорскидан «Дари добро» оешмасы җиңде

“Күрше Фест” халык конкурсы Татарстан Рәисе Рөстәм Миңнеханов башлангычындагы “Безнең ишегалды” республика программасының бер дәвамы. Мондый проект әле илебезнең бер генә төбәгендә дә юк.

Конкурска республикадан барлыгы 585 гариза тапшырылган. 585 гаризаның 310ы үзмәшгульләрдән, ә 275е юридик затлардан кабул ителгән. Иң актив гариза бирүчеләр – Чаллы (109 гариза), Казан (92), Әлмәт районы (43), Түбән Кама (29), Менделеевск (22), Арча (19) һәм Лениногорск (19), Алексеевск (15) һәм Буа (15).

Бәйгедә 42 үзмәшгуль кеше һәм 22 юридик зат җиңүче булды. 

Лениногорскиның “Дари добро” оешмасы юридик затлар юнәлеше буенча гариза тапшырган.

“Безнең проект «Һəр гаилə - бер гаилə» («Каждая семья  - одна семья») дип атала. Без шушы тема буенча булачак чараларның идеясен уйлап таптык, аннары конкурс нигезләмәсе буенча ул чараларның сценарий планын төзергә, проект сметасын билгеләргә иде. Анкета тутырдык һәм конкурска җибәрдек. Безнең проект җиңүчеләр исемлегенә керде. Без грант хисабына өч ишегалдында чара уздырачакбыз”, - ди “Дари добро” иҗтимагый оешмасы җитәкчесе Гүзәл Нугуманова. 

Узачак чаралар программасында мастер-класслар, фотокүргәзмәләр, татар мәдәниятенә һәм шәһәр юбилеена багышланган викториналар да бар. 

Конкурста откан финанс ярдәмен чараларны оештыруга, җиһазларны арендалауга, катнашучыларга призлар алуга, транспорт чыгымнарына тотарга мөмкин. 

Республика буенча проектлар 15 июльдән 30 сентябрьгә кадәр гамәлгә куелачак. Чаралар календаре leto2025.tatar сайтында чыгачак. Лениногорскида “Дари добро” оештырачак чараларны без дә үз чиратыбызда сайтыбызда:

https://zamansulyshy.ru  яктыртып барырбыз. Безне сайттан укыгыз, социаль челтәрләрдә дә карап барыгыз. 
 

фото: https://vk.com/kurshefest