Күрше районда шәхси йортта чыккан янгында хатын-кыз һәм бала үлгән

Янгын сүндерүчеләр ачыклаганча, шәхси торак йортның залында якынча 2 кв.метр мәйданда мебель янган.

Янгынны сүндергәндә 43 яшьлек хатын-кызның һәм 10 яшьлек кыз баланың мәетләре табылган.

11.30 сәгатьтә янгын тулысынча сүндерелгән.

Якынча мәгълүматлар буенча, янгын электр җиһазларын кулланганда иминлек кагыйдәләрен бозу сәбәпле килеп чыккан.

Азнакай районының Чалпы авылында була бу фаҗига. 

Гаилә башлыгы Алмазның Себергә эшкә киткән вакыты булган. “Олы кызлары ишетми, сөйләшми иде. Ул Бөгелмә интернатында калган. Өйдә Ландыш белән кече кызы гына булган. Ул бала дүртенче сыйныфта укый иде. Әлегә янгынның сәбәпләрен төгәл әйтмәделәр, – ди Альянус Мөхәммәтшин.

– Алмаз нишләр инде хәзер? Нинди зур хәсрәт килде бит. Алар авыру балаларын да яхшы карадылар. Елга бер Мәскәүгә алып барып, тикшертерләр иде. Авыл өчен зур кайгы. Алмаз үз авылыбызныкы, Ландыш Мөслим районыннан иде. Ландыш белән кызы йоклаган җирдән уянмаганнар инде. Өйгә кислород кермәгәч, ут чыгып, пыскып торган. Әлегә мин янган йортта идем. Күңелгә бик авыр. Якыннарын югалткан Алмазга, Ландышның якыннарына сабырлык телибез”.

"Татар-информ" сайтыннан

"В.Т." сайтыннан

Фото: МЧС России