Лениногорскига килгән цирк директорына эт ташланган

Бу хакта "Лениногорский журнал" сайты яза. Нәкъ менә "Юбилейный" паркында Мәскәү циркы Яңа ел бәйрәмнәре вакытында үз тамашаларын тәкъдим итәчәк. Алар алдан килеп әзерлек эшләре белән мәшгуль.

Зыян күрүче директор Василий Колос әйтүенчә, ул территориядә хуҗасыз йөрүче Кавказ овчаркасын сыйпарга уйлаган. Әмма эт аның өстенә ташланган. Ир-ат аңардан качып котылу өчен бөтен көченә йөгереп цирк вагонына кереп качмакчы булган... Әмма боз каткан баскычта егылып, ике метр биеклектән очып төшкән. Зыян күрүчене хастаханәгә озаталар. Эт нык тешләмәгән, ләкин табиблар тикшергәннән соң сул кулы сынган, баш мие селкенгән дигән диагноз куйганнар, кулын гипска катырганнар.