Россия Хөкүмәтенең 31 декабрьне ял көне дип билгеләү турындагы закон проекты хупландымы?

Россия Хөкүмәте яңа ел уңаеннан эшләми торган көннәрне (алар Хезмәт кодексында билгеләнгән) саклап калып, 31 декабрьне бәйрәм көне итеп билгеләү турындагы закон проектын хупламады. Бу турыда ТАСС хәбәр итә.

Дәүләт Думасына әлеге тәкъдимне 2020 елның 8 декабрендә ЛДПР фракциясе керткән иде. Документ авторлары фикеренчә, Яңа ел эш көненә туры килгән очракта, күп оешмаларның эш функцияләре тулысынча үтәлми, чөнки хезмәткәрләр бәйрәмгә «әзерләнү» өчен ял ала яки хәтта отпуск рәсмиләштерә. 2022 елның ноябрендә закон проектын карарга җыенулары да билгеле булган иде.

Россия Федерациясе Хөкүмәтенең аңлатма язуында хәбәр ителгәнчә, 2022 елда 31 декабрь ял көненә туры килде һәм 2023 елда да иске елның соңгы көне ял көне булачак.

«Шулай итеп, хәзерге вакытта тәкъдим ителгән [карар] артык», – дип нәтиҗә ясадылар Хөкүмәттә.

Чыганак