Юллар такыр

"Капиталь төзелеш идарәсе" начальнигы Рөстәм Кәбиров сүзләренчә, юл төзелеше буенча тендерны ике оешма үткән. Беренчесе - Яр Чаллы шәһәренең "Спецтехстрой", икенчесе - үзебезнең "Төзекләндерү һәм яшелләндерү" җәмгыяте. Чаллылар плитә түшәү эше белән шөгыльләнсә, безнекеләр җилкәсендә - асфальт җәю.

- Асфальтны шәһәр һәм районда 15 мең квадрат метр мәйданда җәяргә планлаштырабыз. Бүген бу эшләр Крупская урамында бара. Аннан Суворов 1 "А" кварталына күчәләр, анда да асфальт җәеләчәк, - диде Рөстәм Кәбиров.

Бүгенге көндә Ленин проспекты белән Моряков урамында тротуарда плитә җәяләр. Монда подрядчыларның өч бригадасы эшли: проспектта - бер, Моряков урамында - ике бригада. План буенча 9,5 мең квадрат метр мәйданда плитә түшисе бар. Бүгенгә шуның 1,5 меңе үтәлгән. Ә кварталлардагы юлларга асфальтбетон җәелә. (ред: асфальт - ташкүмер һәм сланец токымыннан торган табигый тау сумаласы. Асфальтбетон - вак таш, ком, минераль порошок һәм битум кушылмасыннан торган төзелеш материалы).Шәһәрнең шәхси секторында 22,3 мең квадрат метр мәйданда җәелгән инде ул. Подлесныйда 800 метр, Зәй-Каратай авылында 1 километр асфальт юл салынган. Шәһәрдә асфальтбетонны 6 мең квадрат метр мәйданда салырга планлаштыралар. Бу эш 1,5 мең квадрат метр мәйданда, Заварыкин һәм Кутузов урамнарында тәмамланган.