Зеленая Роща китапханәсендә Үзәк китапханә Гаилә елын рәсми рәвештә ачты (+ фотолар)

Ул көнне Зеленая Роща китапханәсендә чыннан да өй җылысы хакимлек итте. Авыл ул үзе дә бер гаилә сыман, эшләрне киңәшеп, авыл җыеннары үткәреп башкаралар. Гаилә булгач, аның хуҗасы да бар, ул – авыл башлыгы Артемий Потапов.

Тантаналы чараны ул ачып җибәрде, барысына да уңышлар һәм гаилә бәхете теләде.

Чараны алып баручылар: китапханә мөдире Әлфия Хафизова белән китапханәче Оксана Мөхәмәтҗанова сценарийның бар ягын да уйлап төзегәннәр. Чарада катнашучылар һәм китапханәгә килгән гаиләләр арасында ныклы җепләр “тоташтырдылар”.

Чарада дүрт гаилә катнашты: Шәрифуллиннар, Пантюхиннар, Салаховлар, Масагутовлар. Аларның һәрберсе озын тормыш юлы үтеп, авырлыкларда сыналган, ләкин сынмаган гаиләләр. Алар үзләренең гаилә тарихларын сөйләде.

Балалар бакчасы мөдире Резеда Минязева бакчадагы балалар белән килеп, котлаулар ирештерде, балалар шигырьләр укыды.

Зеленая Роща мәктәбе директоры Анна Анисахарова шулай ук чарада катнашты, котлады. Ә укучылар чыгышы барысына да ошады.  

Шулай ук Спиридоновкадан килгән ансамбль җырлар башкарды. Ә Зеленая Роща мәдәният йорты директоры Зәйнәп Хәсәнова һәм сәнгать җитәкчесе Ольга Потапова бию бүләк иттеләр.

Зеленая Роща китапханәсе Лениногорскидан килгән кунакларны ипи-тоз белән каршы алды. Аларга да сүз бирелде. Үзәк китапханәнең милли бүлегеннән Ләйсән Рахманова-Шәмсуарова җыр башкарды.

Соңыннан чәй өстәле артында сөйләшүне дәвам иттеләр.

Язманы тулысынча киләсе атнада “Заман сулышы” газетында укый аласыз.
Розалия Мостафина

Фотолар: Зеленая Роща китапханәсеннән