Лениногорскилы ир-атны хатыны пычак белән яралый

Лениногорск эчке эшләр бүлегенә бу хәл турында шәһәрнең үзәк хастаханәсеннән шалтыратып әйткәннәр.

Яраланган исерек ир кешене аларга шәһәрдәге йортларның берсеннән алып килгәннәр. Ир кеше үзен кухня пычагы белән хатыны яралавын әйткән. Россгвардиячеләр кичекмәстән адрес буенча киткән.

Аларга ишек ачкан хатын-кыз, яралы ирнең тормыш иптәше булып чыккан. Ул әлеге хәлнең ни сәбәпле килеп чыгуын сөйләгән. Аның сүзләренә караганда, ир белән хатын арасында тавыш килеп чыккан. Низаг вакытында ир хатынына кармак белән селтәнә башлаган һәм аны җилкәсеннән каптырып алган. Ә хатыны җавап итеп кухня өстәлендә яткан пычакны алган һәм иренең эченә кадаган.

Бүгенге көндә иренең сәламәтлегенә аңлы рәвештә авыр зыян салучы хатын-кызга карата җинаять эше кузгату турында сүз бара.

Россия Федерациясе Җинаять Кодексының 111 маддәсе шушындый җинаятьләр өчен җәза билгели. Аның нигезендә 8 елга кадәр иректән мәхрүм ителергә мөмкин.