Лениногорскилы ханым мошенниклар корбаны булган

Лениногорскида 63 яшьлек ханым мошенниклар корбаны булган, дип хәбәр итә республика Эчке эшләр министрлыгы сайты.

Ханым интернетта сиделка тәкъдим иткән белдерүне күрә, телефоннан бер ир-ат әнисенә сиделка кирәк булуы турында хәбәр итә. Ханым риза була, теге ир-ат шунда ук әнисенә азык-төлек алырга куша. Аннары төрле темаларга сөйләп, ханымның башын бутый. Ул тиз генә киенә дә банкоматка барып, аферист әйткән цифрларны җыя. Соңыннан ир-ат квитанциясен ыргытырга да куша әле. Ханым өенә кайткач, банктан аның исәп-хисабыннан акча алынуы турында хәбәр килә. Ул тиз генә картасын блокировкалый, тик мошенник 21 мең сумны алып өлгергән була.