Татарстанда лагерьда мина куелуы хакында хәбәр иткән өчен яшүсмерне хөкем итәчәкләр

Татарстанда «Сәләт» балалар лагеренда мина куелуы хакында хәбәр иткән өчен 17 яшьлек яшүсмерне хөкем итәчәкләр. Бу хакта «Татар-информ» агентлыгына ТР прокурорының өлкән ярдәмчесе Руслан Галиев хәбәр итте.

«2018 елның июнендә әлеге яшүсмер Алексеевск районының Биләр авылында урнашкан «Сәләт» балалар лагере территориясе аша узу үтенече белән полиция хезмәткәренә мөрәҗәгать иткән. Полицейский аның үтенечен кире каккан. Моңа җавап итеп, яшүсмер тәртип сакчысына лагерьда мина куелуы хакында әйткән», - диде Руслан Галиев.

Урынга полиция хезмәткәрләре һәм саперлар килгән. Хокук сакчылары лагерьны җентекләп тикшергән, тик шартлаткыч матдә тапмаган.

Яшүсмерне тоткарлаганнар. Ул үз гаебен таныган.

Аңа карата кузгатылган «Террор акты турында ялган хәбәр тарату» маддәсе буенча гаепләү эше Алексеевск район судына тапшырылган.

Әгәр яшүсмернең гаебе расланса, аны 8 елга кадәр ирегеннән мәхрүм итәргә мөмкиннәр.

Бу хакта тулырак: https://tatar-inform.tatar/news/2018/10/23/173916/

фото:pixabay.com