Дустыма

Авылда яши дустым,

Акбай аның исеме.

Шундый исемне куштым,

Исемендә - җисеме.

Бик ягымлы маэмаем,

Сарыла аягыма;

Мине күрсә, Акбаем

Карамый як-ягына.

Дустым миңа тугры бик,

Калмый минем артымнан.

Чын дусны әйтәләр бит,

Кадерле дип, алтыннан.

Эт эчәгесе тамыры

Үсеп чыга тирәннән.

Акбаем кебек тугры,

Дусларым бар тирәмдә.

Дуслар белән арага,

Эт эчәге сармасын.

Ни әйткәнең абайла,

Хәтерләре калмасын.

Эт эчәге тырыша,

Бөтен җирне капларга,

Кыенда дус булыша,

Кирәк дусны сакларга.