"Созвездие-Йолдызлык" фестиваленең вакыты билгеле булды

"Созвездие-Йолдызлык" XVII ачык республика телевизион яшьләр эстрада сәнгате фестиваленең вакыты тәгаенләнде.

2017 елгы фестиваль 9 гыйнвар - 22 апрель көннәрендә үткәреләчәк. Татарстан Премьер-министры Илдар Халиков шул хактагы документка кул куйды. Әлеге документ республиканың хокукый мәгълүматлар сайтында бастырылды.

Илдар Халиков фестивальгә әзерлек һәм аны үткәрү буенча оештыру комитетын да җитәкли. Анда шулай ук ТР мәгариф һәм фән министры Энгель Фәттахов, ТР яшьләр эшләре һәм спорт министры Владимир Леонов, ТР мәдәният министры Айрат Сибагатуллин да кергән.