Баттерфляй стиле катлаулы булса да, лениногорскиның яшь спортчылары яхшы нәтиҗәләр күрсәтте

Лениногорскиның “Юбилейный” бассейнында  йөзү спорты белән шөгыльләнүче малайлар һәм кызлар Әлмәт  командасы белән матч очрашуы үткәрделәр. Ярышлар өчен нәкъ менә шул баттерфляй ысулы сайлап алынган иде. Төрле яшьтәге спортчылардан торган шәһәребез командасы 25 йөзүчедән тора иде. Араларында, билгеле, чагыштырмача күптән түгел генә даими йөзү спорты белән шөгыльләнә башлаган кечерәк яшьтәгеләр, бәйге өчен сайлап алынган стильне өйрәнеп кенә килүчеләр дә бар.

“Мондый очрашулар яшь спортчыларга тәҗрибә туплау өчен  бик кирәкле чара, - ди өлкән тренер Константин Капитонов. - Безнең команда матч очрашуында бик уңышлы чыгыш ясады, нәтиҗәләр дә яхшы. Шәхси беренчелеккә ярышлардан соң, катнаш эстафета ярышлары да булды. Бу араны инде спортчылар төрле стильләр комплексын берләштереп йөзеп үттеләр һәм беренчелекне яулап алдылар. Ел дәвамында балаларны төрле дәрәҗәдәге бик күп ярышлар көтә, аларга әзерлек тукталмый”, - ди.

Әлмәтлеләр белән баттерфляй ысулында спринтлык дистанциясенә ярышларда Лениногорск йөзүчеләре Анастасия Кожевникова, Анастасия Артемьева, Илнар Галиев, Константин Кожевников, Раил Сафин һәм Эльвира Харасова  иң яхшы  нәтиҗәне күрсәттеләр