20нче балалар бакчасында “Ак калфак” оешмасы белән Сабантуй үткәрделәр (+ фотолар)

admin, 1 июль 2022 - 11:00

602

Бәйрәмдә әти-әниләр дә катнашты.

20нче балалар бакчасында “Ак калфак” оешмасы белән Сабантуй үткәрделәр (+ фотолар)

Шәһәребезнең рус телле балалар бакчасында "Ак калфак"лы кызларыбыз һәм бакчадагы тәрбияче апалары Лилия Малиховна Афандиева тырышлыгы белән шаулап-гөрләп Сабантуй узды, дип хәбәр итә “Ак калфак” оешмасы җитәкчесе Тәслимә Рафикова.

“ Бәйрәм чарасына төрле милләт балаларының әти-әниләре дә чакырылган иде. Уен, көлке, халкыбыз уеннары, барысы да мулдан булды бу күңелле минутларда. Шәһәр башлыгы урынбасары Гөлфирә Мәҗитовна Рафикова бүләкләр белән балаларны куандырды. Әти-әниләрнең уеннарда актив булулары, оста баянчы әтиләрнең "Мин яратам сине, Татарстан" җырлары да урынлы булды.
20нче балалар бакчасы мөдире –Валентина Александровна Тарханова бәйрәм хөрмәтенә тәмле ризык - кош теле пешерткән. Камырын ак калфаклы кызыбыз Лилия әзерләгән”, - дип яза Тәслимә ханым.

Сабантуй алдыннан 28 июнь көнендә тәрбияче Лилия Афандиева балалар белән бергә сөлге җыю уздырганнар. Үзәк китапханәгә кадәр барып җиткәннәр. Бүләкне мулдан җыйганнар.