Бүләк аны көтеп торган

Зөлфия үзе - Урдалы авылыннан. "Лениногорская"агрофирмасы"нда бухгалтер булып эшли. Быел беренче тапкыр газетны өенә яздырып ала башлаган. Моңарчы колхоз идарәсе яздыртканнан гына укып барган. Һәм, бирәм дигән колына - чыгарып куяр юлына дигәндәй, зур бүләкнең берсенә хуҗа да булды. Әлбәттә, өеңә яздыртып укудан яхшысы юк. Беренче булып, үз кулыңа алып, иркенләп, ашыкмыйча укып барасың. Бүләк Зөлфия Кәлимуллинаның өенә яздыртканын гына көтеп торган, күрәсең.

-Газет бик ошый. Гадәттә, газетның ахырыннан укый башлыйм, -ди ул. -Котлаулардан таныш кешеләрне эзлим. Урта битләрдән аерым кешеләр, корреспондентлар язган мәкаләләрне шулай ук яратып укыйм. "Заман сулышы" район һәм шәһәр тормышы белән таныштырып бара, яңалыкларны да шуннан беләбез. Безне күбрәк авыл хуҗалыгы тармагына караган язмалар кызыксындыра, мәсәлән, сөт җитештерү, терлекчелек. Шул өлкәдә эшләгәч, ничек кызыксынмыйсың инде. Сезгә уңышлар гына телим, зур рәхмәт үзегезгә,- дип китеп барды ул.

Әлбәттә, җылы сүзләр ишетү рәхәт. Киләчәктә дә "Заман сулышы"на язылучылар белән бергә булыйк.