Керкәле авылында киләсе ел символы барлыкка килде

Яңа елга шәһәр, шулай ук авыллар да бизәлә. Уңган, оста куллылар матур сыннар ясый. Әнә Керкәле авылы мәдәният йорты каршында киләсе ел символы – Аҗдаһа барлыкка килде. Аны авылның уңган кешесе Фәрит Вәлиев ясаган. Ул узган ел да клуб алдына фигуралар ясап куйган булган. Менә быел кар явуга ук, карларны җыеп, савытларга тутырып куйган.

“Фәрит ел саен йорт тирәсендә фигуралар ясап, ишегалдын матур итеп бизәп куя, - дип сөйли хатыны Сания апа. – Яңа ел алдыннан ишегалды тирәсе шулай ямьләнеп китә. Биш оныгыбыз бар, аларга да күңелле була. Әле клуб каршындагы Аҗдаһа фигурасын ясарга алар да бабаларына булышты”, - ди Сания апа.

Фәрит Вәлиев – балта остасы. Озак еллар “Лениногорскнефть” идарәсендә, ЖКЦда эшләгән, кулыннан балтасын төшермичә, көч куйган.

Мәдәният каршындагы фигурага килгәндә, ул аны озак та ясамаган. Алдан карларны җыештырып куйган булган. Сынны ясау өчен кулында көрәк, пычак, кул пычкысы кебек кораллары бар. Соңыннан исә буяуларны җебетеп, Аҗдаһаны яшел төскә буяган, баш киемен зәңгәргә.

Розалия Мостафина

фото: авыл мәдәният йортыннан