Лениногорск урманнарында һәм паркларда талпаннар уянган

Лениногорскилылар урман паркында булганда, киемнәреннән талпан алуларын хәбәр иттеләр.

“Лениногорскида янә талпаннарның иртә активлыгы, талпан вируслы энцефалиты, талпан боррелиозы кебек йогышлы авыруларны таратучылар көтелә", - дип искәртте ТР Гигиена һәм эпидемиология үзәгенең территориаль бүлеге табибы Рамилә Мөхәммәдиева.

Узган елда Лениногорск районында талпан кадалуның беренче очрагы шулай ук апрель аенда теркәлгән булган. Талпан энцефалиты безнең районда соңгы ун елда теркәлмәгән.

«Шулай да Лениногорск районы вируслы талпан энцефалиты буенча эндемик район булып кала, ягъни талпан активлыгы даими рәвештә югары һәм авыру очраклары даими рәвештә теркәлә торган территория », - ди Рамилә Мөхәммәдиева.
Лениногорск территориясендә урманнар шактый, талпаннар өчен иң кулай урыннар, ләкин талпаннарны урман паркында, шәһәр паркларында, скверларда очрашырга мөмкин.

"Киң таралган фикер буенча, талпаннар агачларга менми. Алар башлыча үләндә, сирәгрәк куакларда тереклек итә. Бу бөҗәк, киемгә ябышып, тиресендә «аулак урын» тапканчы өскә үрмәли. Моңа уртача 30 минутка кадәр вакыт китә. Аларны ешрак колак артында, муенда, култык астында, башның чәч үскән өлешендә табалар», - дип аңлата Рамилә Мөхәммәдиева.

Белгечләр кисәтә: талпан вируслы энцефалиты күп кенә күңелсезлекләр китерергә мөмкин. Бу – үзәк нерв системасының күбесенчә зарарлануы белән кискен йогышлы вируслы авыру. Авыру инвалидлыкка һәм авыррак нәтиҗәгә – үлемгә китерергә мөмкин. Вакцинация булмау һәм соңрак медицина ярдәме сорап мөрәҗәгать итү хәлнең начараюының төп сәбәпләре булып тора.