Лениногорскида гаражда чыккан янгында ир-атның тәне пешә

Фаҗига 23 июльдә булган. Әлеге янгында лениногорскилы ир-ат беренче-икенче дәрәҗәдә пешүләр ала. Аны хастаханәгә алып китәләр. 

Янгын урынына янгын сүндерүчеләр, медицина хезмәткәрләре, электр челтәрләре хезмәткәрләре һәм хокук сакчылары килгән. Янгын сүндерүчеләргә килеп чыккан янгынның барлык шартларын ачыкларга туры киләчәк.

Лениногорск буенча күзәтчелек эшчәнлеге һәм профилактика эше бүлеге башлыгы Дамир Вилданов гаражларда янгыннар нигездә берничә сәбәпләр аркасында килеп чыга, ди. Болар: ут белән саксыз эш итү; гаражның, транспорт чараларының электр системаларының электр үткәргечләре төзексезлеге;җылыту приборларыннан файдаланганда янгын куркынычсызлыгы таләпләрен бозу.

«Гаражлар гадәттә йортларга якын урнашкан. Шунлыктан гараждагы янгын күрше корылмаларга утның тиз таралуы белән һәм аны сүндерүдә кыенлыклар белән характерлана. Ситуацияне гаражда саклана торган ягулык савытлары һәм төрле май катнашмалары да катлауландыра», - ди Дамир Вилданов. 

Лениногорск районы буенча күзәтчелек эшчәнлеге һәм профилактика эше бүлеге янгыннардан саклану һәм гараж һәм андагы мөлкәттән мәхрүм калмау өчен гараж зоналарында янгын куркынычсызлыгы таләпләрен үтәргә кирәклеген кисәтә:
- тәмәке тартмагыз һәм гараждагы ачык уттан файдаланмагыз;
- техника озак вакыт туктаганда автомобильнең электр үткәргечен аккумулятор батареясыннан өзегез;
- беренчел янгын сүндерү чаралары: янгын сүндергечләр, комлы тартма һ. б. булсын;
- ягулык-майлау материаллары сеңдерелгән махсус киемнәрне гаражда сакламагыз;
- гаражда буяу эшләрен башкару, шулай ук детальләрне керосин, бензин яисә тиз янучан башка сыеклыклар белән юу, шулай ук транспорт чараларында аккумуляторларны зарядкалау катгый тыела;
- кыска ялганыш булмасын өчен, электр үткәргечләрнең  төзеклеген җентекләп күзәтегез.

Янгын билгеләре турында кичекмәстән «101», яки «112» телефоннары буенча хәбәр итегез.

фото: Д. Вильданов