Лениногорскилылар Татарстан Дәүләт Советы депутатларын сайлауда катнаша

Лениногорск шәһәре һәм районында сайлау участоклары иртәнге 7.00 сәгатьтә үз эшен башлады.

Шәһәр һәм районда 54 сайлау участогы эшләячәк, ике участок – вакытлыча була: берсе – Лениногорск үзәк хастаханәсе территориясендә, икенчесе – “Бәкер” шифаханәсендә.
Сайлау участоклары ачылгач, анда Россия һәм Татарстан гимннары яңгырады. 

Көндезге сәгать 12гә Лениногорск районында сайлау участокларына 30 процентка якын сайлаучы килгән иде, ә шәһәрдә 15 процент сайлаучы тавыш биргән. 

Сайлау участоклары 20.00 сәгатькә кадәр эшләячәк.

Барлыгы 100 депутат сайланачак, 50 депутат – партия исемлегеннән, 50 депутат бермандатлы сайлау округларыннан.

Татарстан Үзәк сайлау комиссиясе биш сәяси партия исемлеген теркәде: «Яңа кешеләр», ЛДПР – Россиянең либераль-демократия партиясе», Гадел Россия – Патриотлар – гаделлек өчен», «Бердәм Россия», «КПРФ – Россия Федерациясенең коммунистлар партиясе». 100 депутат мандатына барлыгы 397 кандидат дәгъва итә.
 

Розалия Мостафина фотосы