ЯҢАЛЫКЛАР
ОДНга “дару” таптык...
Торак-коммуналь хезмәтләр өчен түләү квитанциясендә ниләр язылганын аңлыйбызмы? Әллә инде бурыч җыелмасын дип кенә түләп барабызмы? Сер түгел, күбебез кәгазьдәге саннарны тикшереп тә тормый, суммасын да санап азапланмый. Ә менә идарәче оешмаларның күрсәткән хезмәтләренә тоткан су, җылылык өчен күпме акча килгәненә борчылучылар да шактый икән. Бу хакта кичә "Татар-Информ" мәгълүмат...
Торак-коммуналь хезмәтләр өчен түләү квитанциясендә ниләр язылганын аңлыйбызмы? Әллә инде бурыч җыелмасын дип кенә түләп барабызмы? Сер түгел, күбебез кәгазьдәге саннарны тикшереп тә тормый, суммасын да санап азапланмый. Ә менә идарәче оешмаларның күрсәткән хезмәтләренә тоткан су, җылылык өчен күпме акча килгәненә борчылучылар да шактый икән. Бу хакта кичә "Татар-Информ" мәгълүмат үзәгендә җиткерделәр.
- Соңгы арада ОДНга кагылышлы сораулар белән мөрәҗәгать итүчеләр кимеде. Әмма җылылыкка кагылышлы һәм юридик сораулар көн саен килеп тора, - ди Татарстанның Торак-коммуналь хезмәтләр өлкәсендәге җәмәгать контроленең төбәк үзәге директоры Дмитрий Романов.
- Кешеләрнең торак хуҗалыгы өлкәсендә белемнәре юк. Шуңа да алар югалып кала. Хәтта бу өлкәдә эшләүчеләр үзләре дә, кайчак коммуналь хезмәтләр өчен түләү квитанцияләрен дөрес төзи белмичә, безгә килә. Әгәр кеше торак хуҗалыгы өлкәсендә нидер белергә тели икән, безгә килеп, бушлай укый ала. Белемең булганда гына үз хокукларыңны яклап була".
Дмитрий Романовның сүзләрен "Уңайлы йорт" идарәче оешмасы җитәкчесе Марат Нуриев та хуплый.
- Укымышлы кешеләр белән эшләү безгә дә җиңел. Идарәче оешмалар алдында торган зур проблемаларның берсе - бүгенге таләпләргә туры килерлек кадрлар җитмәү. Кайдадыр укытып, безнең тармакка җибәрерләр дип көткән идек. Тик белгечләр табылмады. Шуңа да хәзер үзебездә ресурс үзәге төзеп, кирәкле һөнәргә укытабыз. Әйтик, урта яшьләрдәге кеше вакытлыча эшсез калды, ди. Машина йөртүче сәламәтлегенә бәйле проблемалар белән башка рульгә утыра алмый. Әнә шундыйларны без үзебез өчен укытабыз. Әмма шулай да бүген белемле сантехник һәм электриклар һаман җитми", - ди Марат Нуриев. Коммуналь хезмәтләр өчен түләү квитанцияләрен язуларга ул да тукталды.
- Һәр йортта үз эшен белгән бер кеше булырга тиеш. Без аны йорт буенча җитәкче дип атыйбыз. Әгәр ул йорттагы исәпләгеч күрсәтмәләрен дөрес итеп тапшыра икән, әлбәттә, түләү аз киләчәк. Тик андый кешеләрне табып булмый. Алар бушка эшләргә риза түгел. Милекчеләр үзләре риза булып, акча түләсә, әлбәттә, эшләрләр инде. Без үзебез хезмәт күрсәткән районда бу проблеманы әкренләп хәл итәбез. Заманнан артта калмаска кирәк. Хокук ягыннан да белемле булу комачау итми. Милекченең идарәче оешма алдында үз хокуклары да, бурычлары да бар. Шуңа күрә игътибарлы булырга кирәк. Әйтик, ОДН түләвен алыйк. Ул әллә кайчаннан бетте инде. Без аңа "дару" таптык. Йортта яшәүчеләр үз нормативларын түли, калганын идарәче оешма күтәрә. Һәр кеше үз хокукын белсен, белми икән, белемен күтәрсен", - ди ул.
ТКХ өлкәсе буенча белем эстәргә телисез икән, 236-29-97 телефон номерына шалтыратып, гариза бирә аласыз. Мин дә бу өлкәдә белемне арттырырга уйладым әле. Очрашудан соң, әлеге номерга шалтыраттым. Бер генә җыюдан эләгеп булмаса да, сөйләшү насыйп булды. Трубканы алган кыз исем-фамилиямне, элемтә өчен телефон номерымны язып алды. Тиздән шалтырату көтәргә кушты. Менә шундый хәлләр.
http://www.vatantat.ru
Следите за самым важным и интересным в Telegram-каналеТатмедиа
Безнең Телеграм-каналга кушылыгыз: https://t.me/zamansulyshy
Нет комментариев