Таһир Шәмсуаровтан өр-яңа шигырь

Кышкы манзара

Мартны көтеп яткан кырпак карлар

Шуып төшә өйләр башыннан.

Кыеклардан тамган тамчылар да

Язлар җитте диеп ялгышкан.

Табигатьтә гыйнвар чуагыдыр,

Бер җылыта, аннан суыта.

Тал да әнә энҗе шәлен салган -

Кышның озынлыгын оныткан!

Яңа елның бүләк тунын киеп

Елмаялар, күрче урамнар.

Бил тиңентен карга чүгә төшеп

Февраль аен көтә бураннар!

Чормалардан сирәк төшәбез дип,

Көйсезләнгән киез итекләр.

Кукмараның ак итеген киеп

Көязләник әле егетләр!

Гаҗәпләнмә, битне сыйпап алса

Шаян җилләр чыгып каршыга.

Ай туганны алыштырам диеп

Тау артыннан кояш ашыга.

Күңел күзе саулар килешерләр,

Кыштан гүзәл фасыл юк сыман.

Тау битләре чаңгы-чана шуар

Авыл балаларын юксынган!

Кыеклардан тамган тамчылар да

Язлар килер диеп ялгышкан.

Тиргә баткан карлар түзәлмичә

Шуып төшә өйләр башыннан...

14.01.2018

Таһир Шәмсуаров

фото:http://www.stihi.ru/pics/2017/03/04/2157.jpg