Якташ шагыйребез туган як турында

Карамыйча җирдә фасылларның 
Карлы, дымлы эссе чагына. 
Сагынуын салып иңнәренә 
Кеше кайта туган ягына. 

Кеше дә бит кеше нәселеннән 
Туган якка канат кагына. 
Алтын чагын, бала чагын эзләп 
Кеше кайта туган ягына. 

Күңел күзең әгәр күрә икән 
Хәтерләрне яңарт тын гына. 
Иске өйдә калган иске бишек 
Каен матча, сине сагына. 

Туры килсә туры капкаларның 
Ачылмаган бикле чагына. 
Талдан үргән гади читәннәрне, 
Җил капканы кеше сагына. 

Кояш Шөгер тау артыннан чыга, 
Болыты да безгә агыла. 
Әти-әни каршы ала диеп, 
Кеше кайта туган ягына. 

Карамыйча җирдә фасылларның 
Көзле-кышлы, язлы чагына. 
Сагынуын салып иңнәренә
Кеше кайта туган ягына.