Үзенчәлекле чаналарда таудан җилдерделәр генә (+фотолар)

Креатив чаналар конкурсында катнашырга районның ерактагы авылыннан да килгән иделәр. Чаналар бизәлеше төрлелегенә исең китәрлек: монда совет пионерлары да, Кыш бабай белән Кар кызы да, татар әкиятләре персонажлары да, яраткан мультфильм геройлары да бар иде. Шәһәр һәм район предприятие-оешмалары тарафыннан  7 экипаж тәкъдим ителде.

Осталыкны һәм фантазияне эшкә җигеп ясаган чаналарда финишка кадәр барып җитү – конкурсның төп шарты иде. Шулай ук таудан төшәр алдыннан үзенчәлекле жанр ясау – өстәмә балл бирде.

“Полосатый рейс” командасы составында социаль программаларны озату Үзәге һәм “Татнефть” компаниясенең бизнеска хезмәт күрсәтү Үзәге хезмәткәрләре үз чаналарына 2022 ел символы – Юлбарсны җигеп килгәннәр. Кыш бабай һәм Кар кызы чанада фестивальне карарга килгән тамашачыларны сәламли.

Балалар иҗат йорты педагоглары мәктәп формасы һәм пионер галстуклары белән ерактан җәлеп итеп тордылар. Барабаннарда куар-кодларга кадәр ясаганнар.

Балалар иҗат йортының укучылары – фестивальдә иң яшь катнашучылар. “Мультяшки” командасы үз чаналарын фанерадан ясап килгәннәр. Әлбәттә, оста педагоглары булышкан. 11 яшьлек Әмир кечкенә юлбарс костюмында иде. “Тизрәк таудан төшәсе килә, безнең чана шуармы икән?”- ди.

“Өч койрык, өч аяк” командасы –  “Лениногорскнефть” идарәсенең производство хезмәт күрсәтү цехы хезмәткәрләре “Леопольд” чана-автомобиль ясаганнар. Ул машинада барысы да бар: руль, фаралар, магнитола, көзгеләр куелган.
Команданың фестивальгә әзерлеге күренеп тора иде. Чананы тәкъдим итүләре дә җайлы гына килеп чыкты.

-    Чананы ясаганда крагис, шөрепләр һәм ОСП кулландык. Без чананы чын күңелебезне биреп эшләдек, һәрберебезнең күңеленә “Леопольд” мультфильмы якын бит, - ди ЦПО слесарь-ремонтчысы  Динар Якупов.
Аниматорлар балаларның күңелен ачты, алар белән уеннар уйнадылар. Балалар конкурсларда да катнашты. Оештыручыларның берсе – Дилә Мазанкина әйтүенчә, Лениногорск халкының күңеленә фестиваль хуш килде. “Җылы атмосферада узды, командаларны берләштерде”, - ди ул.

Беренче, икенче, өченче урын алучыларга һәм номинацияләрдә җиңүчеләргә диплом һәм истәлекле бүләкләр тапшырдылар. “Иң креатив чана” исемен “Лениногорскнефть” идарәсенең производство хезмәт күрсәтү цехы командасы алды.

Наталья Звонарёва
ФОТОЛАР:  Сергей Трусов.