Таһир Шәмсуаров: Таҗлы чәчәкләр кирәк

Яшәр өчен яратылган
Туганнан бирле йөрәк.
Таҗлы вируслар кирәкми,
Таҗлы чәчәкләр кирәк!

Офыктан кояш чыгуны
Һәр кеше таңда көтә.
Яз килде, гөрләвек белән
Борчулар агып китә!

Без афәтне күргән халык,
Югалтулар арада.
Төзәлеп бетмәгән әле
Сугыштагы яралар!

Төшенкелеккә бирелми
Җиңү яулаган халык.
Бар шикле, начар уйларны
Аяк астына салыйк!

Киләчәк капкасын ачу
Синнән һәм миннән тора.
Ак һәм кара тәнлеләрне
Берләшергә чакыра!

Җир шары бердәм гаилә,
Яшим дип тибә йөрәк.
Таҗлы вируслар кирәкми,
Таҗлы чәчәкләр кирәк!

Таһир Шәмсуаров