Коръән мәгънәләренең татарча басмасы җәмәгатьчелеккә тәкъдим ителде
Мәскәүдә Татарстан Республикасының Тулы вәкаләтле вәкиллегендә, дин әһелләре һәм татар җәмәгать эшлеклеләре катнашында Коръән мәгънәләренең татар теленә тәрҗемәсе – «Кәлам Шәриф. Мәгънәви тәрҗемә» басмасы тәкъдим ителде. 760 битле басма "Хозур" нәшриятында 1000 данәдә басылып чыккан.
Фундаменталь хезмәт ТР мөселманнары Диния нәзарәте тарихында Коръән мәгънәләренең үзе әзерләгән беренче тәрҗемәсе булып тора, ул Татарстанда игълан ителгән Коръән тәфсире елы кысаларында дөнья күрде.
Басманы әзерләгәндә, мөфтият белгечләре татар һәм иске татар телләрендәге тәфсирләр, аеруча Ногмани, Мөхәммәд Садыйк ибн Шаһ Әхмәт Имәнколый Казаниның “Тәсхил әл-бәйан”, Шәйхелислам Хәмидинең “Әл-Иткан” хезмәтләре, шулай ук гарәп һәм төрек телләрендәге тәфсирләр файдаланган. Моннан тыш, тәрҗемәчеләр бүгенге заман татар тәфсирләре авторлары Рабит Батулла, Фәрид хәзрәт Салман, Габделбари хәзрәт Исаев һ.б.ның тәҗрибәләренә дә мөрәҗәгать иткән.
"Коръән мәгънәләренең ТР мөселманнары Диния нәзарәте әзерләгән тәрҗемәсе үзенең төгәллеге белән аерылып тора һәм Каләм Шәрифнең төп нөсхәсенең (оригиналының) синтаксик конструкциясенә һәм лексик составына мөмкин кадәр якын итеп китерелә. Бу исә укучыны мәгънәви ялгышлардан саклый", - дип белдерде Татарстан мөфтияте.
Татарстан мөселманнары Диния нәзарәте әзерләгән «Кәлам Шәриф. Мәгънәви тәрҗемә» басмасын Казанда нәзәрәт карамагындагы "Хозур" нәшриятында (Тукай урамы, 36 йорт) бүгеннән сатып алырга мөмкин, дип хәбәр итте "Татар-информ"га Татарстан мөфтиенең мәгълүмати сәясәт буенча киңәшчесе Ришат Хәмидуллин.
Тәрҗемә татар җәмәгатьчелегенә Татарстан Республикасының Россия Федерациясендәге Тулы вәкаләтле вәкиллегендә тәкъдим ителде.
Бу хакта тулырак: https://tatar-inform.tatar/news/2019/10/17/195495/
Следите за самым важным и интересным в Telegram-каналеТатмедиа
Безнең Телеграм-каналга кушылыгыз: https://t.me/zamansulyshy
Нет комментариев