Тулай торак душында юынганда 18 һәм 19 яшьлек ике егетне ток сугып үтергән

26 мартка каршы төндә Көньяк Сахалин шәһәрендә урнашкан тулай торакта ике егет мәете табылган. Аларны душ бүлмәсендәге су җылыткычтан ток сугып үтергән дип фаразлыйлар. Бу турыда «Вести» каналы хәбәр итте.

Сахалин өлкәсе губернаторы Валерий Лимаренко төбәктәге бөтен социаль оешмаларда электр җиһазларын тикшерергә кушкан. Мәрхүмнәрнең гаиләләренә ярдәм күрсәтеләчәк, диелә бу хәбәрдә.

Мәрхүмнәр Сахалин дәүләт университеты студентлары булган. 18 һәм 19 яшьлек егетләрнең үлеме сәбәпләрен тикшерүчеләр ачыклый. Россия Тикшерү комитетының Сахалин өлкәсе буенча Тикшерү идарәсенең матбугат хезмәте җинаять эше ачылу турында хәбәр итте.

«Комсомольская правда» белешмәсе буенча, фаҗига вакытында душта өч егет була. Исән калган студент иптәшләрен коткарырга маташа. 

Егетләр иртәнге якта душка керә. Берсен ток суга. Икенчесе иптәшенә ярдәм итмәкче була, ләкин аны да ток суга. Бу ике егет урында ук һәлак була. Урынга килгән ашыгыч ярдәм табиблары аларның үлемен раслый. 

Тулай торактагы секция старостасы Ксения Нелидова сүзләренчә, душ бүлмәсендә өченче студент та була. Ул электр бирүне туктата, душ бүлмәсенә ишекне ватып ача. Әлеге этажда яшәүче студентлар килеп җитә, алар ток суккан егетләргә ярдәм итәргә тырышып карый. 

«КП-Сахалин» сайтының югары уку йортында чыганаклары сүзләренчә, мондый очраклар булгалаган инде. Яшьләрне ток суккан, тик җитди нәтиҗәләр булмагач, аңа игътибар бирүче булмаган. Укучылар тулай торак комендантына хәбәр итмәү сәбәбе дә билгеле түгел.

Мәрхүм егетләр педагогик профиль буенча 1 һәм 2 курста математика һәм физика укытучысы булырга укыган. Алар Тымов һәм Долин районнарыннан килгән булган.

Бу тулай торакта электр челтәре үткәргечләрен берничә ел элек кенә алмаштырганнар. Студентлар су җылыта торган титан ватык булгандыр дип фаразлый, диелә хәбәрдә. 

РИА Новости шаһитлар сүзләренә сылтама белән хәбәр иткәнчә, студентлар су җылыткычтагы проблемалар турында тулай торак администрациясенә моңа кадәр дә әйткән булган. Тик аларга «куркыныч юк» дип җавап биргәннәр.

Тулырак: Интертат

http://agryz-rt.ru