Авыл халкының "отпуск" ялы ахырына якынлаша: тагын шул бакча, каз-үрдәк, тавык-чебеш арасында кайнашыр вакыт җитә. Хәер, инде арбаны кыштан әзерләп, бүген үк чебеш алып җибәрүчеләр бар. Тавык тәрбиягә талымсыз булса да, чебине бәби кебек карарга кирәк. Атна-ун көнгә җиткәнче бигрәк тә. Сайлавы да җиңелләрдән түгел. Кемнең чирләшкә кош аласы килсен? Аннан соң берәүләргә чебинең фәкать тавыгы гына кирәк, икенчеләр исә әтәчне хуп күрә.

Буа районының Казма авылында яшәүче Мөхәррәм абый Мөбәрәкшинның шәхси инкубаторы бар. Дөрес, зурдан кубып эшләми. Инкубаторга 72 йомырка сыя. Инде кыштан ук чебигә шактый заказ җыелган.

- Йомры йомыркадан тавык, озынчасыннан әтәч чыга дигән ышану бар. Шулай туры да килә, - диде ул. - Бер тәүлеклек чебиләрнең кайсы әтәч, кайсы тавык икәнен дә аерырга була. Моның өчен аның аягыннан эләктереп күтәрергә кирәк. Тавык чеби башын аска яшерә, әтәче өскә күтәрә.

Авыру чебинең күзгә ташланып торган билгесе: ул канатын сала һәм арт ягы юеш була икән.

Мөхәррәм абый әтәчне ел саен алыштырып тора. Юкса, бер нәселдән сәламәт чеби чыкмый, тавыкның йомыркасы да вак була, ди.

- Чеби чыкканнан соң ике-өч көн аңа ашарга кирәкми. Бу вакытта аның эчендәге "желток" бетәргә тиеш. Шуннан соң манный һәм тары ярмасы сибәләр. Куе итеп пешергән чәйнең дә зыяны юк. Соңрак юып тарттырылган бодай, кукуруз катнашмасы кирәк. Бөртеклеләрне юып тарттырмасаң, чебиләр йөткерә башлый, бу исә үлемгә китерергә мөмкин.

Халык арасында мондый сынамышлар да йөри. Чебиләрне тартмага салгач, тышкы ягыннан шакырга кирәк. Сәламәт чебиләр тавыш килгән якка киләләр, чукып карыйлар.

Әтәчне тавыктан аеру өчен исә, чебинең канатын турайтыгыз. Әтәчнең канат йоннары бертигез озынлыкта, ә тавыкның төрле-төрле була.

Чыганак: http://mediametrics.ru/rating/ru/843/hour.html?search=intertat.ru