Бер юл һәлакәте аркасында 10 бала ятим калган

Башкортстанда Ямашлы сусаклагычында килеп чыккан юл-транспорт һәлакәте буенча җинаять эше кузгатылган. 18 апрельдә көндез Күгәрчен авылы янында фаҗига була: автомобиль суга төшеп китә. Руль артында исерек хәлдәге хатын-кыз була - ул исән кала, әмма аның өч пассажиры да урында ук вафат була. Һәлак булган 53 яшьлек хатын-кызның - биш баласы, 36 яшьлек хатынның - ике һәм 49 яшьлек хатынның - өч баласы әнисез кала. 48 яшьлек машина йөртүче хатын-кыз исән кала. 

Машина йөртүче тоткарланган

Россия Эчке эшләр министрлыгының Зианчур районы буенча бүлеге Россия Җинаять кодексының 264 маддәсенең 6 өлеше буенча, юл хәрәкәте кагыйдәләрен бозып, саксызлык аркасында кеше үлеменә китерү яки транспорт чараларын эксплуатацияләү кагыйдәләрен бозу турында җинаять эше кузгатты. Төп гаепләнүче-Күгәрчен авылында яшәүче 1974 елгы хатын-кыз.

Беренчел мәгълүматлар буенча, 18 апрель көнне хатын-кыз хезмәттәшләре белән бергә спиртлы эчемлекләр кулланган. Аннары «ВАЗ-21140» автомашинасы руле артына утырып, алар белән якында гына урнашкан сусаклагыч яр буе ягына киткән. Дамба буйлап хәрәкәт иткәндә, хатын-кыз идарәне югалта һәм машина суга төшеп киткән. Машина йөртүче су астына китүче машинадан чыга һәм яр буенча чыга алган. Биредә аны авыл кешесе күреп алган һәм ашыгыч ярдәм чакырткан. Килеп җиткән табиблар аңардан юл-транспорт һәлакәте турында белеп ала һәм бу хакта район полиция бүлегенең дежур частена хәбәр итәләр. Өч пассажирның үле гәүдәсе сулыктан чыгарылган.

Медицина тикшерүе нәтиҗәләре буенча, машина йөртүченең канында 0,928 мг/л спиртлы эчемлек булуын күрсәткән. 
"Машина йөртүче тоткарланды. Үз гаебен танып күрсәтмәләр бирде. Тикшерү барышында килеп чыккан хәлнең төгәл шартларын билгеләү өчен кирәкле экспертиза һәм тикшерүләр үткәреләчәк. Россия Җинаять кодексының 264 маддәсенең 6 өлеше буенча каралган җинаять кылган өчен гаепләнүчегә 15 елга кадәр ирегеннән мәхрүм ителү яный", - дип хәбәр иткән Эчке эшләр министрлыгының Башкортстан буенча матбугат хезмәте.

"Башинформ" язганча, беренчел мәгълүматлар буенча, үлемгә китергән һәлакәт алдыннан әлеге компаниядәге бер хатын-кызның туган көне булган. Кәеф-сафа корып утыралар һәм өйләренә таралышалар. 18 апрель иртәсендә, алар эшкә килә - дүртесе дә "Ямашлы" ял йортында пешекчеләр булып эшләгән - яңадан спиртлы эчемлекләр кулланалар. Аларның берсе кояшлы көнне сусаклагыч янына барып килергә тәкъдим итә. Руль артына баш пешекче утыра. Тик әлеге сәяхәтләре генә аянычлы тәмамлана. 

Шунысын билгеләп үтәргә кирәк, исән калган йөртүче машина суда бата башлагач, ишекне ача һәм автомобильдән чыга ала. 
Шул авыл кешесе Дамба ярында юеш киемнән утырган хатынны күреп ала да, аңа "ашыгыч ярдәм" чакырта. Шуннан соң гына шок хәлендә булган машина йөртүчесе өч хезмәттәшенең суга батуы турында сөйли. 

Зианчура районы хакимияте башлыгы Дамин Юланов "Башинформа"га барлык һәлак булган хатыннарны 19 апрель көнне җирләүләре турында хәбәр иткән. Муниципалитет, үз компетенцияләре кысаларында, һәлак булганнарның гаиләләренә ярдәм күрсәтәчәк. Аның сүзләренә караганда, һәлак булган хатын-кызларның балаларының күбесе балигь, бары тик өчесе генә - мәктәп яшендәгеләр.
"Без булдыра алганча ярдәм итәчәкбез, безнең компетенцияләр кысаларында. Балалар белән эшлибез, өчесе - мәктәп яшендә, балигъ булмаганнар. Әлбәттә, бу фаҗига ", - дигән мәгълүмат агентлыгына район администрациясе җитәкчесе.

http://shahrikazan.ru/news/kyiskacha-ya%D2%A3alyiklar/ber-yul-lakte-arkasynda-10-bala-yatim-kalgan

https://pixabay.com/ru