Бәйге игълан ителде: кыйммәтле бүләкләр көтә

2016 ел Россия Монополиягә каршы федераль хезмәтенең Татарстан буенча идарәсе өчен мөһим һәм истәлекле булачак - идарә 25 еллыгын билгеләп үтә.

Әлеге вакыйга уңаеннан Татарстан монополиягә каршы көрәш идарәсе ТР Мәгариф һәм фән министрлыгы белән берлектә иҗади бәйге игълан итә. Бәйгенең максаты - мәктәп укучыларын әхлакый яктан тәрбияләү, гражданлык мәдәниятен формалаштыру, монополиягә каршы органның кулланучылар мәнфәгатьләрен яклаудагы эшчәнлегенең мөһимлегенә төшендерү.

Үз көчен 8-10 сыйныф укучылары сынап карый ала. Бәйге ике номинация буенча уздырыла: инша, эссе, шигырьләр һәм төрле жанрда ясалган рәсемнәр.

Бәйгенең нигезләмәсе һәм тәртибе белән идарәнең рәсми сайтында (fasrt.ru) "Яңалыклар" бүлегендә танышырга мөмкин. Җиңүчеләрне кыйммәтле бүләкләр көтә.

http://intertat.ru/