Районыбызның Тукмак авылында зиратта өмә узды

Тукмак авылының данлыклы үткәне бар. Киләсе елга авылның оешуына 100 ел тула. Монда беренчеләрдән булып Мөхәмәтҗан Гиматов дигән кеше килеп урнашкан. Зур вакыйганы каршы алырга җыенган авыл зираты да чиста, пөхтә һәм төзек булырга тиеш дип саныйм.

Якты дөнья белән хушлашучыларның мәңгелек йорты – зиратка 19 май көнне авылдашлар җыелды. Алар ел саен булыша. Наилә һәм Таң Сафиннар, Фаил Идиятуллин, Илшат һәм Ринат Могыйновлар, Люция, Нәҗибә, Мидхәт, Фәрхәт, Ильяс, Тахир, Зөфәр, Галия, Розалия, Әнисә, Гөлүсә, Зөлфирә апа, Гөлфия – барысы бергәләп, чистартуга өлешләрен кертте. Бик зур рәхмәт яусын аларга, игелекле эшләре меңе белән әйләнеп кайтсын.

Тик зиратта җыештыру эшләре төгәлләнмәде әле. 2 июнь көнне тагын җыелачакбыз. Шунлыктан, башкаларны да чакырабыз өмәгә, читтә яшәүчеләр дә кайтсын иде. Бу белдерү хакында белгәннәргә дә хәбәр итүегез сорала. Өмә иртәнге сәгать  8дә башланачак. Бергәләп чистартыйк.

Нәҗибә Хисамиева.

Автор фотосы