Лениногорск наркоманы Бөгелмә урманында адашкан
Лениногорскилы Бөгелмә урманында яшерелгән урыннан наркотик матдәне алырга барган җиреннән үзе дә адаша.
Бу хакта “Бугульминская газета” хәбәр итә.
Лениногорскилы 35 яшьлек ир-ат Бөгелмә урманында адашкач, полициягә мөрәҗәгать итә. Патруль-пост хезмәте вәкилләре аны эзләргә кузгала. Табалар ир-атны. “Төнлә белән нишләп йөрисең урманда?” дигән сорау биргәч, ир-ат куркып кала һәм нервлана башлый.
Хокук саклау хезмәткәрләре аны тикшергән вакытта куртка кесәсеннән 1,23 грамм синтетик наркотик табалар.
Полиция бүлегендә ир-ат наркотик матдәне интернет аша үзе өчен сатып алганы турында әйтә, ә урманда аңа дип җибәрелгән координант аша урынны эзләгәнен сөйли.
Лениногорскилыга карата җинаять эше ачылган, беркая да чыгып китмәү турында подписка бирелгән.
Следите за самым важным и интересным в Telegram-каналеТатмедиа
Безнең Телеграм-каналга кушылыгыз: https://t.me/zamansulyshy
Нет комментариев